Një drejtues treni i kompanisë Trenitalia, me emrin Alessandro Ambrosio, 34 vjeç, është gjetur i pajetë pranë parkingut në sheshin perëndimor të stacionit të Bolonjës, në Itali.
Sipas informacioneve paraprake, i riu është goditur me thikë në bark, duke humbur jetën si pasojë e plagëve të marra. Trupi i pajetë është gjetur nga një punonjës tjetër i Trenitalia-s, i cili ka njoftuar menjëherë autoritetet.
Nga hetimet e para dyshohet se viktima nuk ishte në detyrë në momentin kur ndodhi ngjarja. Policia italiane ka nisur hetimet për zbardhjen e plotë të rrethanave dhe motiveve të krimit.
Pamjet e kamerave të sigurisë kanë fiksuar momentin kur autori largohet me vrap nga vendngjarja pas sulmit. Deri më tani, autori nuk është arrestuar ende, ndërsa kërkimet vijojnë.
