Presidenti i Shteteve të Bashkuara, Donald Trump, ka përsëritur paralajmërimin se Irani do të përballet me pasoja shumë të rënda nëse autoritetet iraniane vrasin protestues gjatë demonstratave që po vazhdojnë në vend. “Po e monitorojmë situatën nga afër. Nëse ata fillojnë të vrasin njerëz, ashtu siç kanë vepruar në të kaluarën, mendoj se do të përballen me goditje shumë të ashpra nga Shtetet e Bashkuara”, deklaroi Trump nga Air Force One.
Protestat nisën më 28 dhjetor në Teheran, kur tregtarët mbyllën dyqanet e tyre në shenjë proteste ndaj përkeqësimit të gjendjes ekonomike. Me kalimin e ditëve, ato u përhapën në zona të tjera dhe morën një karakter më të gjerë, me pjesëmarrësit që tashmë po artikulojnë edhe kërkesa politike.
Sipas të dhënave zyrtare, të paktën 12 persona kanë humbur jetën që nga e mërkura, mes tyre edhe anëtarë të forcave të sigurisë. Këto protesta konsiderohen më të mëdhatë që nga vitet 2022–2023, periudhë gjatë së cilës qindra persona u vranë dhe mijëra të tjerë u arrestuan pas vdekjes në paraburgim të Mahsa Amini, e ndaluar nga policia e moralit për shkelje të dyshuar të kodit të rreptë të veshjes.
