Ka ndërruar jetë këtë të diel Pandeli Opingari, ish-futbollist i shquar i Flamurtarit dhe figurë e njohur e sportit vlonjat, dy ditë pasi u aksidentua rëndë teksa po kalonte në vijat e bardha në qytetin e Vlorës.
Aksidenti ndodhi më 2 janar, në rrugën “Demokracia”, ku 96-vjeçari u përplas nga një automjet tip Audi, i drejtuar nga një 22-vjeçar me inicialet O. A.. I moshuari u transportua me urgjencë në spital dhe ndodhej nën kujdesin e mjekëve, por fatkeqësisht nuk arriti t’u mbijetojë plagëve të marra, duke ndërruar jetë pas dy ditësh.
Pas ngjarjes, policia arrestoi drejtuesin e mjetit, ndërsa rasti u hetua si aksident rrugor i ndodhur teksa këmbësori po kalonte në vijat e bardha.
Ndarja nga jeta e Pandeli Opingarit, i njohur për shumëkënd edhe si profesor Pompi, ka sjellë trishtim të madh në Vlorë dhe në komunitetin sportiv. Ai ishte një nga figurat më të respektuara të futbollit vlonjat, ish-futbollist i Flamurtarit në vitet ’60–’70, mësues i edukimit fizik, trajner, intelektual dhe shembull i qytetarit model.
Një jetë e tërë e lidhur me sportin dhe edukimin, që u ndërpre tragjikisht jo nga mosha, por nga një aksident rrugor.
Homazhet në nderim të Pandeli Opingarit do të zhvillohen nesër, në orën 11:00, pranë Stadiumit “Flamurtari”, për t’i dhënë lamtumirën e fundit një emri që la gjurmë në historinë e sportit vlonjat.
🕊 Lamtumirë, profesor Pompi.
