Një incident i pazakontë është regjistruar në zonën e njohur 'Walking Street' në Pattaya të Tajlandës, ku një turist indian është dhunuar nga disa transgjinorë, pas një mosmarrëveshjeje për pagesën e një “shërbimi”.
Sipas mediave lokale, bëhet fjalë për një shtetas indian 52-vjeçar, i identifikuar si Raj Jasuja, i cili në pamjet që po qarkullojnë në rrjet shihet duke u konfliktuar me disa transgjinorë, të cilët i kërkonin pagesën e një shume parash.
Raportohet se pasi ai ka refuzuar të paguajë dhe ka tentuar të largohet me makinë, situata është përshkallëzuar. Personat e përfshirë e kanë nxjerrë me forcë nga automjeti dhe e kanë goditur, ndërsa në sherr janë përfshirë edhe persona të tjerë të pranishëm në zonë.
Sipas një raportimi të medias tajlandeze Thaiger, ekipet e emergjencës kanë mbërritur në vendngjarje dhe e kanë gjetur 52-vjeçarin me dëmtime në fytyrë dhe në pjesën e pasme të kokës. Atij i është dhënë ndihma e parë në vend dhe më pas është transportuar drejt Spitalit Pattamakun për trajtim të mëtejshëm.
Një dëshmitar 19-vjeçar ka deklaruar për shërbimet e emergjencës se fillimisht ka parë një debat verbal mes turistit indian dhe një personi transgjinor pranë hyrjes së Walking Street, i cili më pas është kthyer në konflikt fizik, duke përfshirë edhe persona të tjerë. Sipas tij, shkaku i sherrit lidhej me mospagimin e shumës së rënë dakord për “shërbimin”.
Ngjarja është filmuar dhe pamjet po qarkullojnë gjerësisht në rrjetet sociale, ndërsa autoritetet lokale nuk kanë dhënë ende një reagim zyrtar mbi rastin.
