Hëna e parë e plotë e vitit 2026, e njohur si “Hëna e Ujkut”, pritet të ndriçojë qiellin e natës të shtunën dhe do të jetë një spektakël i veçantë për vëzhguesit e qiellit. Kjo hënë e plotë është superhëna e katërt radhazi, pas Hënës së Korrjes në tetor, Hënës së Kastorit në nëntor dhe Hënës së Ftohtë në dhjetor. Nëse qielli do të jetë i kthjellët, Hëna do të shfaqet më e madhe dhe më e ndritshme se zakonisht, ndërsa një pamje e ngjashme pritet të shihet sërish vetëm në nëntor 2026.
Viti 2026 do të jetë i veçantë edhe për faktin se do të ketë gjithsej 13 hëna të plota në vend të 12, pasi muaji maj do të ketë dy të tilla. Hëna e plotë shtesë njihet si “hëna blu”, një fenomen relativisht i rrallë që ndodh rreth çdo dy vjet e gjysmë dhe ka dhënë jetë shprehjes “një herë në një hënë blu”.
Emërtimi “Hëna e Ujkut” vjen nga traditat e amerikanëve autoktonë, të cilët gjatë netëve të ftohta të dimrit dëgjonin ulërimat e ujqërve të uritur që afroheshin pranë vendbanimeve njerëzore. Sot, ky emër mbetet simbolik, ndërsa fenomeni astronomik vazhdon të tërheqë vëmendjen e publikut si një nga pamjet më mbresëlënëse të qiellit të natës.
