Shqipëria po përgatitet për heqjen e tarifave roaming me vendet e Bashkimit Europian, duke i hapur rrugë zbatimit të regjimit “Roaming Like At Home” brenda vitit 2026.
Ministria e Infrastrukturës dhe Energjisë ka hedhur për konsultim publik ndryshime në ligjin “Për Komunikimet Elektronike”, të cilat synojnë përafrimin e plotë të legjislacionit shqiptar me atë të BE-së në fushën e komunikimeve elektronike. Sipas projektligjit, qytetarët shqiptarë do të mund të përdorin minutat, mesazhet dhe internetin celular në vendet e BE-së pa asnjë kosto shtesë, njësoj si brenda territorit të Shqipërisë. I njëjti rregull do të zbatohet edhe për qytetarët e BE-së që vizitojnë vendin tonë.
Për të garantuar që përfitimi të reflektohet realisht te përdoruesit, ligji parashikon uljen e kostove teknike mes operatorëve dhe vendosjen e mekanizmave mbikëqyrës. Risi e rëndësishme janë edhe gjobat për operatorët telefonikë që nuk do të zbatojnë rregullat e reja të roaming-ut.
Kjo nismë konsiderohet një hap i rëndësishëm drejt integrimit të Shqipërisë në tregun unik digjital të Bashkimit Europian, duke lehtësuar lëvizjen e lirë të qytetarëve, turizmin dhe aktivitetin e bizneseve ndërkufitare.
Më herët, presidentja e Komisionit Europian, Ursula von der Leyen, e ka cilësuar heqjen e tarifave roaming për telefoninë celulare si një hap domethënës në procesin e integrimit të Shqipërisë në Bashkimin Europian.
