Një ngjarje e rëndë ka ndodhur në lagjen “5 Maj” të qytetit të Elbasanit, ku një person është gjetur i djegur në një ambient të përshtatur për banim, në katin e parë të një pallati pranë stadiumit “Elbasan Arena”. Personi, i seksit mashkull, ndodhet në gjendje kome.
Shërbimet zjarrfikëse ndërhynë pasi banorët raportuan erë djegieje. Zjarrfikësit hapën me forcë qepenin e ambientit dhe gjetën personin pa ndjenja dhe me djegie të rënda. Si masë sigurie, energjia elektrike u ndërpre për rreth një orë në një pjesë të bllokut të banimit.
Sipas informacioneve paraprake, dyshohet se aksidenti mund të ketë ndodhur pas kontaktit me rrymën elektrike, megjithatë autoritetet nuk përjashtojnë as pista të tjera. Policia ka nisur hetimet për zbardhjen e plotë të rrethanave të ngjarjes.
