Banorët e lagjes Fermë në bashkinë Cërrik po përballen prej gjashtë ditësh me mungesë totale të ujit të pijshëm, duke e bërë jetesën e përditshme të vështirë dhe problematike për qindra familje.
Sipas banorëve, deri më tani nuk ka pasur asnjë njoftim apo sqarim nga institucionet përgjegjëse lidhur me arsyet e ndërprerjes së furnizimit me ujë. Kjo situatë po ndikon drejtpërdrejt në jetën e tyre, duke i detyruar të blejnë ujë për gatim ose ta sigurojnë tek fqinjët që kanë puse private.
Mungesa e ujit, sipas tyre, ka krijuar vështirësi serioze edhe për nevojat më elementare, si higjiena personale, ndërsa shumë familje shprehen se nuk kanë mundësi ekonomike për të përballuar blerjen e vazhdueshme të ujit.
Banorët e lagjes Fermë e cilësojnë situatën si të papranueshme dhe kërkojnë ndërhyrje të menjëhershme nga autoritetet për rikthimin e furnizimit normal me ujë të pijshëm. Sipas tyre, rreth 400 familje janë të prekura nga ky problem, megjithëse vetëm një pjesë e vogël pranojnë të flasin publikisht për situatën.
