Njoftimi i fundit i Departamentit Amerikan të Thesarit për vendosjen e sanksioneve ndaj familjes Hysa, me shtetësi meksikane dhe origjinë shqiptare, ka rikthyer vëmendjen mbi lidhjet gjithnjë e më të shpeshta mes karteleve të drogës në Meksikë dhe grupeve kriminale me rrënjë shqiptare. Sipas autoriteteve amerikane, familja akuzohet për pastrim parash në favor të fraksionit “Mayiza” të Kartelit Sinaloa, duke u shtuar një serie rastesh që tregojnë bashkëpunimin ndërkombëtar mes këtyre strukturave kriminale.
Ekspertët e sigurisë theksojnë se grupet kriminale shqiptare janë shndërruar në partnerë të rëndësishëm për kartelet latino-amerikane, kryesisht për shkak të rolit të tyre dominues në shpërndarjen e drogës në Evropë. Përmes një rrjeti të gjerë të ngritur në porte strategjike, qendra financiare dhe qytete të mëdha evropiane, këto klane kanë krijuar kanale të qëndrueshme për trafikun dhe tregtimin e lëndëve narkotike, duke u bërë aleatë të besueshëm për organizata si Karteli Sinaloa apo CJNG.
Përveç trafikut të drogës, një tjetër element kyç i këtij bashkëpunimi është aftësia për pastrimin e parave. Hetimet tregojnë se klane me origjinë shqiptare janë të përfshira në investime në pasuri të paluajtshme, kazino, hotele dhe biznese të ndryshme në Evropë dhe më gjerë, duke ofruar një infrastrukturë financiare komplekse dhe të vështirë për t’u gjurmuar. Pikërisht ky kombinim i shpërndarjes së drogës dhe pastrimit të parave ka bërë që lidhjet mes organizatave kriminale shqiptare dhe meksikane të forcohen ndjeshëm vitet e fundit.
