Një video e mbërritur së fundmi në redaksinë e JOQ Albania ngre një alarm serioz për gjendjen e shoqërisë sonë dhe mënyrën se si po deformohen vlerat, sidomos te të rinjtë.
Në pamje shfaqen dy të mitur, një vajzë dhe një djalë, jo më shumë se 15 vjeç, gjatë një transmetimi “live” në rrjetin social TikTok. Ajo që trondit nuk është thjesht prania e tyre në rrjet, por arsyetimi i tyre: ata ankohen se audienca ka rënë, pasi nuk po shajnë më, ndryshe nga një ditë më parë.
Në video dëgjohet vajza që shprehet: “Kam qejf t’i shaj një çik.”
Ndërsa djali thotë: “A e shikon që sot që nuk po shajmë nuk ecën audienca fare, 37 veta. Mbrëmë që ju morëm tezet për mbarë, shkoi audienca në kulm. Hajt e merre vesh. Duhet sharë popullsia, që të rritet audienca.”
Ky nuk është thjesht një episod banal në rrjetet sociale. Ky është një pasqyrim i dhimbshëm i një shoqërie ku antivlera po shpërblehet, ku fyerja, banaliteti dhe dhuna verbale kthehen në mjet për famë, klikime dhe ndjekës.
Por turpi nuk bie vetëm mbi këta fëmijë. Turpi më i madh është i atyre që i ndjekin, i nxisin, i duartrokasin dhe u japin audiencë. Sepse fëmijët nuk shpikin vetë modele; ata i kopjojnë ato që shoqëria i shpërblen.
Kur një i mitur arrin në përfundimin se “duhet sharë që të rritet audienca”, problemi nuk është TikTok-u, por ne si shoqëri. Prindër, ndjekës, platforma, institucione, të gjithë kemi pjesën tonë të përgjegjësisë.
Po krijohet një realitet i rrezikshëm ku e dëmshmja bëhet e pranueshme, ku antivlera promovohet dhe normalizohet, ndërsa respekti, përmbajtja dhe komunikimi i shëndetshëm mbeten pa vëmendje.
Kjo video nuk duhet të shpërndahet për tallje apo sensacion, por të shërbejë si zile alarmi. Sepse sot është audienca, nesër është karakteri, dhe pasnesër është shoqëria që po rritet mbi baza të shtrembëruara.
A është ky fundi i edukatës në shoqëri apo thjesht maja e ajsbergut? Kush mban përgjegjësi kur një 15-vjeçar kërkon famë përmes fyerjes?
JOQ Albania e publikon këtë reflektim për të nxitur ndërgjegjësim: Fama që ndërtohet mbi fyerjen nuk është sukses. Është dështim kolektiv.
