Një në tre të rritur flasin me ChatGPT dhe Alexa për të mos ndjerë vetmi

Një raport i publikuar nga Instituti i Sigurisë së Inteligjencës Artificiale (AISI) tregon se një në tre të rritur në Mbretërinë e Bashkuar po përdorin inteligjencën artificiale për mbështetje emocionale ose për biseda sociale. Sipas studimit, një në 25 persona e përdor këtë teknologji çdo ditë, ndërsa përdoruesit më të shpeshtë i drejtohen chatboteve si ChatGPT apo asistentëve zanorë si Alexa për të përballuar ndjenjat e vetmisë dhe për të pasur kontakt social.

Hulumtuesit kanë analizuar gjithashtu një komunitet online në Reddit me mbi dy milionë përdorues, të dedikuar për shokë virtualë të bazuar në IA. Ata kanë vërejtur se ndërprerja e funksionimit të këtyre chatbot-eve shoqërohej me raportime për ankth, depresion dhe probleme me gjumin te një pjesë e përdoruesve, duke nxjerrë në pah varësinë në rritje emocionale ndaj teknologjisë.

Raporti thekson se aftësitë e sistemeve të IA-së po zhvillohen me shpejtësi, duke arritur të kryejnë detyra komplekse që zakonisht kërkojnë vite përvojë njerëzore, madje duke tejkaluar ekspertët në fusha si biologjia dhe duke përparuar në kimi. Ndërkohë, ekspertët paralajmërojnë për rreziqet e humbjes së kontrollit mbi sistemet e avancuara, edhe pse aktualisht nuk ka prova se ato mund të veprojnë në botën reale pa u zbuluar, ndërsa masat mbrojtëse vazhdojnë të forcohen.