Kryeministri Edi Rama ka reaguar këtë të diel në lidhje me skandalin e AKSHI-t dhe hetimin e nisur nga SPAK për tenderat e dhëna. Gjatë podkastit të tij “Flasim”, Rama doli në mbrojtje të Mirlinda Karçanajt, duke theksuar rolin e saj në zbatimin e vizionit qeverisës për transformimin digjital të administratës përgjatë 12 viteve.
Ashtu si në raste të mëparshme, kryeministri shprehu kritika ndaj drejtësisë, duke e cilësuar masën e sigurisë të vendosur ndaj Karçanajt si të tepruar. Rama theksoi se e vërteta duhet të dalë vetëm nga drejtësia dhe jo nga debati politik apo mediatik, ndërsa vlerësoi kontributin e AKSHI-t në përparimin e Shqipërisë në fushën e shërbimeve digjitale.
“AKSHI përballet sot me një hetim nga SPAK për përdorimin e fondeve dhe Mirlinda Karçanai që udhëhoqi jetësimin e vizionit tonë qeverisës transfomimin digjital të qeverisë me dije me vullnet e përkushtim të përditshëm për 12 vite, gjendet nën një masë sigurie me një akuzë të hatashme për të cilën duhet pritur me durim vetëm nga drejtësia jo nga 700 tenxheret e çorbës politike dhe mediatike, që të dalë e vërteta e saj. Por e di që falë saj dhe Skuadrës së AKSHI, Shqipëria ka bërë një kapërcim të madh”,- u shpreh Rama.
