Digjen dhjetëra autobusë në sektorin Rinia në Durrës

Një numër i lartë autobusësh janë përfshirë nga flakët pasditen e sotme në sektorin Rinia. Siç shihet edhe në pamjet, mjetet e transportit janë të parkuara shumë pranë njëri-tjetrit, çka ka favorizuar përhapjen e shpejtë të zjarrit nga një autobus te tjetri.

Në vendngjarje kanë mbërritur forcat zjarrfikëse, të cilat po punojnë për shuarjen e flakëve. Operacioni është zhvilluar me vështirësi për shkak të terrenit kënetor, që ka penguar lëvizjen e mjeteve zjarrfikëse dhe ndërhyrjen e shpejtë.

Ende nuk dihet shkaku i zjarrit masiv që ka shkrumbuar disa prej autobusëve. Autoritetet nuk kanë konfirmuar nëse bëhet fjalë për zjarrvënie të qëllimshme apo aksidentale, ndërsa mbetet e paqartë edhe se kujt i përkasin këto mjete transporti.