Vlonjatët njihen për lidhjen e fortë që kanë me detin dhe duket se as i ftohti i dimrit nuk i ndalon nga ky pasion. Në Vlorë është kthyer në traditë që qytetarë vendas, por edhe persona të ardhur nga qytete të tjera apo të huaj, të lahen në det gjatë gjithë vitit. Edhe në muajt më të ftohtë, si dhjetori, brigjet e detit mbushen me grupe shokësh që hyjnë në ujë pa u shqetësuar nga temperaturat e ulëta apo kushtet atmosferike.
Pamja e njerëzve që notojnë në det në mes të dimrit është tashmë e zakonshme për qytetin bregdetar. Ata e shohin larjen në det jo vetëm si zakon, por edhe si mënyrë për të ruajtur shëndetin dhe energjinë. Për shumë prej tyre, uji i ftohtë konsiderohet sfidë, por edhe burim force fizike dhe mendore, duke treguar se për vlonjatët, i ftohti nuk është pengesë.
Ajo që bie më shumë në sy është fakti se shumica e personave që praktikojnë larjen në det gjatë dimrit janë të moshës së tretë, mbi 60 apo 65 vjeç. Këta qytetarë janë shembull i vitalitetit dhe guximit, duke treguar se mosha nuk i ndalon të jenë aktivë. Ata e kanë kthyer këtë zakon në pjesë të përditshmërisë së tyre dhe e ndajnë shpesh me miq e bashkëmoshatarë.
Mes tyre nuk mungojnë as gratë, të cilat sfidojnë veten dhe moshën për të vijuar këtë traditë. Me buzëqeshje dhe vendosmëri, ato tregojnë se deti është pjesë e jetës së tyre, pavarësisht stinës. Kështu, Vlorë vazhdon të dallohet si qyteti ku deti dhe njeriu mbeten të lidhur ngushtë, edhe kur temperaturat bien dhe dimri ndihet më fort.
