Teksa deputetët e qarkut Vlorë shfaqen në Sarandë mes këngëve, valleve dhe fotove festive, qyteti i Vlorës po përballet me mungesën e ujit të pijshëm. Një realitet i hidhur për qytetarët, që në ditë festash mbeten pa një nga nevojat më bazike, ndërsa përfaqësuesit e tyre politikë duken më të zënë me festa sesa me hallet e qytetit.
Ditën e sotme, një defekt në një tubacion kryesor të ujit ka lënë pa furnizim një pjesë të konsiderueshme të Vlorës. Tubacioni me diametër 1000 mm, një nga linjat kyçe të rrjetit, u dëmtua duke nxjerrë në pah edhe një herë gjendjen e amortizuar të infrastrukturës dhe mungesën e investimeve serioze nga Bashkia e Vlorës.
Sipas burimeve, pasditja solli vetëm një zgjidhje provizore, e cila nuk ka garantuar furnizim të qëndrueshëm për banorët e qytetit. Riparimi i plotë është shtyrë për në orët e mëngjesit, duke e lënë qytetin sërish në pritje dhe banorët të varur nga improvizimet.
Situata bëhet edhe më qesharake kur kujton se deputetët e Vlorës, të zgjedhur për të përfaqësuar interesat e qytetarëve, nuk janë parë të reagojnë apo të japin ndonjë shpjegim publik për situatën. Asnjë deklaratë, asnjë kërkesë llogarie, asnjë shqetësim i shprehur për qytetin që po mbetet pa ujë.
Në vend të kësaj, pamjet festive nga Saranda qarkullojnë në rrjet, duke thelluar edhe më shumë indinjatën e qytetarëve, të cilët pyesin se kush po i përfaqëson realisht dhe kujt i shërben mandati i tyre.
Vlora vazhdon të përballet me të njëjtin problem të vjetër, ndërsa përgjegjësia endet sa nga një institucion te tjetri.
Ndërsa deputetët festojnë. Vlonjatët presin për ujë.
