Një aksident i rëndë automobilistik ka ndodhur pak minuta më parë në aksin rrugor Levan–Tepelenë, në zonën e njohur si kryqëzimi i Cakranit.
Sipas të dhënave paraprake, në aksident janë përfshirë dy automjete, një Mercedes dhe një Peugeot. Si pasojë e përplasjes së fortë, drejtuesi i mjetit Peugeot, shtetasi O. M., i dyshuar fillimisht rreth 19 vjeç por më pas sipas policisë 16 vjeç, ka ndërruar jetë gjatë transportimit drejt spitalit.
Drejtuesi i automjetit tjetër ka pësuar dëmtime të lehta dhe është shoqëruar në komisariat për kryerjen e veprimeve të mëtejshme procedurale.
Në vendngjarje kanë mbërritur menjëherë shërbimet e Policisë, si dhe një mjet zjarrfikës, për të ndihmuar në normalizimin e trafikut dhe pastrimin e rrugës. Grupi hetimor po vijon punën për të sqaruar shkaqet dhe rrethanat e aksidentit.
Autoritetet u bëjnë thirrje drejtuesve të mjeteve të tregojnë kujdes të shtuar, veçanërisht në akset me qarkullim të lartë.
Fier/Informacion paraprak: Rreth orës 19:00, në aksin rrugor "Levan-Tepelenë", në fshatin Cakran, automjeti me drejtues shtetasin S. B., 30 vjeç, është përplasur me automjetin me drejtues shtetasin e mitur O. M, rreth 16 vjeç. Si pasojë e përplasjes shtetasi O. M, ka ndërruar jetë gjatë transportit për në spital. Grupi hetimor ndodhet në vendngjarje dhe po kryen veprimet për zbardhjen e rrethanave dhe shkakut të aksidentit.
