Alkooli mbetet një nga faktorët kryesorë që ndikon në vdekjet e lidhura me lëndimet, duke përbërë rreth një të tretën e tyre, sipas një raporti të Organizatës Botërore të Shëndetësisë (OBSH). Organizata nënvizon se konsumimi i alkoolit dëmton aftësinë për të gjykuar dhe për t’u koordinuar, çka rrit ndjeshëm rrezikun për aksidente rrugore, dhunë dhe incidente të tjera të rënda.
Raporti tregon se ky fenomen prek të gjitha vendet evropiane, pa dallim moshe apo gjinie, megjithëse të rinjtë dhe burrat rezultojnë më të prekurit nga vdekjet që lidhen me përdorimin e alkoolit. OBSH thekson se ky realitet përbën një problem serioz të shëndetit publik dhe kërkon masa të menjëhershme parandaluese.
Për të ulur ndikimin e dëmeve të shkaktuara nga alkooli, OBSH rekomandon forcimin e politikave kufizuese për aksesin ndaj pijeve alkoolike, zhvillimin e fushatave ndërgjegjësuese dhe ndërhyrje të posaçme për grupet më të rrezikuara. Sipas organizatës, politika të koordinuara në nivel kombëtar dhe rajonal janë thelbësore për të reduktuar humbjen e jetëve dhe barrën sociale e ekonomike që lidhet me keqpërdorimin e alkoolit.
