Qytetarët që po kthehen nga Greqia drejt Shqipërisë përmes pikës kufitare të Kakavijës po përballen me trafik të rënduar dhe pritje të gjata, duke mbetur të bllokuar për orë të tëra.
Sipas udhëtarëve, automjetet nuk lëvizin pothuajse fare, ndërsa radha e mjeteve ka kaluar gjatësinë prej 6 kilometrash. Një situatë e ngjashme raportohet edhe në pikën kufitare të Kapshticës, ku fluksi i automjeteve në hyrje të vendit është i lartë dhe qarkullimi zhvillohet me vështirësi.
Kjo gjendje lidhet me periudhën e festave të fundvitit, Krishtlindjen dhe Vitin e Ri, kur shumë emigrantë shqiptarë që jetojnë dhe punojnë në Greqi po kthehen në atdhe për të festuar pranë familjeve të tyre.
