Të paktën pesë persona, përfshirë një fëmijë 2-vjeçar, kanë humbur jetën pasi një aeroplan i vogël i Marinës Meksikane u rrëzua të hënën pranë bregut të Teksasit, afër Galveston, gjatë një misioni humanitar. Aeroplani po transportonte fëmijën nga qyteti jugor meksikan, Merida, për trajtim mjekësor në Shtetet e Bashkuara.
Nga tetë personat që ndodheshin në bord, dy kanë mbijetuar, ndërsa një tjetër rezulton i zhdukur.
Presidentja e Meksikës, Claudia Sheinbaum, konfirmoi se fëmija ishte një ndër të vdekurit dhe tha se ekipet e shpëtimit po vazhdonin kërkimin për personin e zhdukur. “Ngushëllimet e mia për familjet dhe të gjithë ata që udhëtonin në aeroplan,” deklaroi Sheinbaum gjatë konferencës së saj të zakonshme të mëngjesit.
Në bord ndodheshin gjithashtu mjekë, infermierë, personel i Marinës dhe të afërm të fëmijës. Sipas raportimeve, fëmija 2-vjeçar kishte pësuar djegie të shkallës së tretë nga një derdhje uji i valuar dhe disa spitale pranë qytetit Escarcega nuk kishin kapacitet për ta trajtuar.
Sheinbaum theksoi se rrëzimi do të hetohet dhe se qeveria po bashkëpunon ngushtë me autoritetet amerikane për të kuptuar se çfarë ndodhi gjatë 10 minutave kur aeroplani humbi kontaktin me stafin tokësor në Galveston.
