Gys Agasi fotografohet në Kukës

Nga Ministria e së Vërtetës.

Pas zhdukjes misterioze të verës nga vila në Tiranë, Gys Agasi është fotografuar në Kukës duke ecur i qetë në borë, me disa shishe verë në krah, në atë që autoritetet e përshkruajnë si “migrim sezonal i kantinës”.

Sipas burimeve satirike, vera është zhvendosur për arsye sigurie, pasi “në Tiranë kishte filluar të ndjehej e kërcënuar nga inventarët, doganat dhe kamerat e sigurisë”.

“Është verë që do liri,” – mësohet të ketë thënë Agasi, ndërsa pozonte mes maleve, duke dëshmuar se vera shqiptare jo vetëm pihet, por edhe ecën.

Burime pranë ngjarjes bëjnë me dije se Kukësi u zgjodh si destinacion sepse:

• vera ruhet më mirë në të ftohtë,
• serverët nuk ndjekin dot terrenin malor,
• dhe askush nuk pyet pse dikush shëtit me shishe vere në borë.

Ndërkohë, SPAK po heton pistën e re se vera nuk është kontrabanduar, por thjesht ka kaluar në statusin “turist malor”, ndërsa serveri i kamerave dyshohet se “ka marrë pushime pa lajmëruar”.

Autoritetet nuk përjashtojnë mundësinë që vera të rikthehet në pranverë, më e pjekur, më e ftohtë dhe pa akcizë.