Një qytetar ka ngritur një shqetësim të fortë në lidhje me lundrën e Butrintit, e cila prej shumë vitesh ka qenë e vetmja urë lidhëse për banorët e zonës. Sipas tij, kjo lundër është lënë në harresë nga institucionet shtetërore, duke rrezikuar çdo ditë jetën e qindra qytetarëve që e përdorin atë.
Çdo ditë, në lundrën e Butrintit hipin qindra persona, mes tyre fëmijë, të moshuar dhe punëtorë, të cilët duhet të shkojnë në shkollë, në punë apo të kryejnë nevojat e përditshme në anën tjetër të qytetit. Për këta banorë, lundra nuk është luks, por domosdoshmëri jetike.
Në këtë situatë, qytetari ngre një pyetje shqetësuese: “Çfarë do të ndodhte me këta njerëz nëse lundra përmbytet ose del jashtë funksioni?” Ai thekson se ndërtimi i një ure të vogël do ta kishte zgjidhur përfundimisht problemin dhe do të kishte garantuar sigurinë e qytetarëve, pa i ekspozuar ata ndaj rrezikut të përditshëm.
Sipas denoncimeve të shumta, lundra e Butrintit pëson shpesh defekte, prishet ose del jashtë funksioni, duke paralizuar lëvizjen e banorëve dhe duke i lënë ata të izoluar, veçanërisht gjatë periudhës së dimrit, kur kushtet atmosferike janë më të rënda.
Në këtë kontekst, Bashkia Sarandë duhet të marrë seriozisht rrezikun që u kanoset qytetarëve dhe të ndërmarrë masa konkrete dhe të menjëhershme për garantimin e sigurisë së tyre. Jeta e njerëzve nuk mund të lihet në mëshirë të fatit, ndërkohë që zgjidhja është e thjeshtë dhe e realizueshme.
