Një qytetar nga Kodër Vora, i quajtur Elvir Deliallisi Maloku, ka bërë një denoncim të fortë në redaksinë e JOQ Albania, ku pretendon se është dhunuar fizikisht dhe kërcënuar në mënyrë të përsëritur për shkak të një konflikti pronësie, ndërsa shpreh dyshime serioze për mosveprim dhe favorizim nga ana e Komisariatit të Policisë Vorë.
Sipas qytetarit, i cili ka dërguar edhe një video me zë dhe figurë, ai është sulmuar rreth orës 14:00 nga shtetasi Alfonc Gjoka, duke pretenduar se është goditur me shufra hekuri dhe gurë. Qytetari shprehet se disponon shenja fizike në trup dhe prova të tjera që, sipas tij, dëshmojnë dhunën e ushtruar ndaj tij.
Ai thekson se kjo nuk është hera e parë që përballet me situata të tilla, duke pretenduar se prej kohësh po kërcënohet dhe dhunohet në mënyrë të vazhdueshme për shkak të një konflikti pronësie. Sipas tij, personi në fjalë po tenton t’i marrë banesën dhe pronën përmes dokumenteve që ai i cilëson si të falsifikuara.
Në deklarimin e tij për JOQ Albania, qytetari shprehet se autoritetet policore në Vorë nuk kanë marrë asnjë masë mbrojtëse, pavarësisht denoncimeve të përsëritura. Ai pretendon se ka bërë disa kallëzime dhe paraqitje në komisariat, por sipas tij, nuk është ndërmarrë asnjë veprim konkret.
Madje, qytetari shkon më tej duke pretenduar se ndodhet nën presion dhe kërcënime edhe nga vetë përfaqësues të policisë. Në videon e dërguar, ai shprehet se pas daljes nga Komisariati i Vorës, është kërcënuar nga një oficer i Policisë Gjyqësore, të cilin e identifikon si Naim Kadiu. Sipas tij, oficeri e ka akuzuar për “dëshmi të rreme”, pavarësisht se qytetari pretendon se faktet janë të filmuara dhe të dokumentuara.
Qytetari pohon se pas publikimeve të mëparshme në JOQ Albania, situata e tij është përkeqësuar. Ai shprehet se ndihet i kërcënuar, se ka frikë të paraqitet në komisariat dhe se, sipas tij, po përballet me një formë hakmarrjeje vetëm sepse ka zgjedhur të denoncojë publikisht rastin.
Në komunikimet e vazhdueshme me redaksinë, qytetari pretendon gjithashtu se i është penguar hyrja në banesën e tij dhe se policia, sipas tij, nuk ka shoqëruar personin që ai akuzon, edhe në raste kur është thirrur në vendngjarje. Ai shprehet se ndodhet në gjendje të rënduar emocionale dhe shëndetësore, duke përmendur dridhje trupore dhe rrahje të shpeshta zemre.
Sipas tij, ndaj shtetasit Alfonc Gjoka është hapur edhe një padi civile për çështjen e pronësisë, ndërkohë që konflikti vazhdon të jetë i hapur dhe i pazgjidhur. Qytetari thekson se aktualisht nuk disponon të gjithë dokumentacionin e pronësisë për t’ia vënë në dispozicion redaksisë, por pretendon se procedurat ligjore janë në vijim dhe se familjarë të tij kanë ndjekur rrugën civile.
JOQ Albania sjell në vëmendje se disa muaj më parë ka publikuar edhe një tjetër denoncim të këtij qytetari, ku ai pretendonte se po përballej me presione nga autoritetet lokale dhe policia e Vorës. Qytetari shprehet se pas atij publikimi, sipas tij, ka nisur një formë presioni dhe kërcënimi të vazhdueshëm ndaj tij.
Duke qenë se bëhet fjalë për pretendime serioze, të njëanshme dhe të pakonfirmuara nga institucionet zyrtare, JOQ Albania i bën thirrje Policisë së Shtetit, konkretisht Komisariatit të Vorës, si dhe strukturave përkatëse të Prokurorisë, që të sqarojnë publikisht nëse ka pasur ose jo një ngjarje të tillë dhune, çfarë veprimesh janë kryer dhe nëse janë marrë masa për garantimin e sigurisë së qytetarit.
JOQ Albania thekson se ky artikull pasqyron vetëm pretendimet e qytetarit, të shprehura në deklarimet dhe materialet e dërguara prej tij, dhe mbetet e hapur për çdo reagim, sqarim apo qëndrim zyrtar nga ana e institucioneve apo personave të përmendur në këtë denoncim.
