Një aksident i rëndë është regjistruar mbrëmjen e sotme në zonën e rrotullimit të Bradasheshit, pranë Paraburgimit të Elbasanit, ku janë përfshirë dy automjete, të cilat janë përplasur 'kokë më kokë'.
Ngjarja ka ndodhur rreth orës 20:10, në një segment me fluks të lartë mjetesh, duke shkaktuar kaos dhe ndërprerje të përkohshme të qarkullimit rrugor.
Sipas informacioneve paraprake, dyshohet se një manovër e gabuar parakalimi nga njëri prej drejtuesve ka qenë shkaku i përplasjes së fortë mes automjeteve.
Si pasojë e aksidentit, kanë mbetur të plagosur drejtuesit e të dy mjeteve si edhe dy pasagjerë. Të lënduarit janë transportuar menjëherë drejt spitalit për të marrë ndihmën e nevojshme mjekësore, ndërsa nuk ka informacion mbi gjendjen e tyre shëndetësore.
Pamjet nga vendi i ngjarjes tregojnë qartë dëmtimet e mjeteve të përfshira, ndërsa aksidenti ka shkaktuar shqetësim te drejtuesit e tjerë të automjeteve që qarkullonin në zonë
Në vendngjarje kanë mbërritur shërbimet e Policisë dhe ambulancat, të cilat kanë ndërhyrë për menaxhimin e situatës dhe për rikthimin e qarkullimit në normalitet. Grupi hetimor po punon për të sqaruar plotësisht shkaqet dhe rrethanat e aksidentit.
