Qeveria ka miratuar në mbledhjen e saj të fundit emërimin e Andrea Shllakut në detyrën e zëvendësministrit të Mbrojtjes, sipas vendimeve të publikuara zyrtarisht.
Andrea Shllaku është i afërm i ministrit aktual të Mbrojtjes, Pirro Vengu, konkretisht djali i tezes së tij. Ky fakt është raportuar nga mediat pas zbardhjes së vendimit të Këshillit të Ministrave.
Sa i përket përvojës profesionale, Shllaku ka mbajtur për rreth tre vite pozicionin e Përgjegjësit të Shërbimeve të Brendshme në Kryeministri, ku është angazhuar në planifikimin dhe realizimin e operacioneve logjistike në nivel të lartë qeveritar. Më herët, ai ka shërbyer për tre vite si shef kabineti i Drejtorit të Përgjithshëm Ekzekutiv në Autoritetin Portual Durrës, si dhe për dy vite si Drejtor i Divizionit Operacional, me përgjegjësi për mbikëqyrjen e operacioneve portuale.
Së fundmi, Andrea Shllaku ka ushtruar funksionin e Këshilltarit të Jashtëm për Infrastrukturat Portuale pranë Ministrisë së Mbrojtjes.
Mediat kanë raportuar gjithashtu se më herët, gjatë kohës kur Pirro Vengu drejtonte Autoritetin Portual të Durrësit, Shllaku ka qenë i punësuar në këtë institucion dhe më pas është angazhuar si këshilltar në Ministrinë e Mbrojtjes, përpara emërimit aktual si zëvendësministër.
Emërimi i tij i shtohet listës së vendimeve të fundit të qeverisë në strukturat drejtuese të ministrive.
