Këshilli i Mandateve dhe Imunitetit është mbledhur që prej orës 10:30 me dyer të mbyllura për të shqyrtuar kërkesën e SPAK për autorizimin e heqjes së imunitetit të zv.kryeministres Belinda Balluku. Mbledhja po zhvillohet në Kryesinë e Kuvendit, mes debateve të forta për mënyrën e administrimit të provave të paraqitura nga Prokuroria e Posaçme.
Gjatë diskutimeve, përfaqësuesit e Partisë Socialiste kanë këmbëngulur që provat të shqyrtohen vetëm brenda mbledhjes dhe që USB-ja me materialet hetimore të mos u dorëzohet anëtarëve të Këshillit për përdorim individual. Në kundërshtim me këtë qëndrim, prokurorët e SPAK kanë deklaruar se materiali i përfshirë në USB mund të aksesohet nga të gjithë anëtarët e Këshillit të Mandateve dhe se secili prej tyre ka të drejtë të njihet me provat.
Ndërkohë, avokati i Belinda Ballukut ka kërkuar shtyrjen e mbledhjes, duke argumentuar se i nevojitet më shumë kohë për të përgatitur mbrojtjen dhe për t’u njohur plotësisht me materialet hetimore. Kërkesa e tij pritet të shqyrtohet nga Këshilli, ndërsa mbledhja vijon me dyer të mbyllura.
