Detaje të reja janë zbardhur lidhur me vendosjen e lëndës plasëse në një automjet në zonën e Selitës së Vogël, në orët e para të mëngjesit të sotëm.
Burime bëjnë me dije se 39-vjeçari Dritan Jano është nipi i Thoma Janos, i cili deri pak kohë më parë ka mbajtur postin e zëvendësprokurorit të Përgjithshëm, përgjegjës për sektorin e përgjimeve. Një nga pistat kryesore që po hetohet lidhet pikërisht me veprimtarinë e xhaxhait të tij në sistemin e drejtësisë.
Gjithashtu, bashkëshortja e Dritan Janos, Dorina Jano, rezulton të jetë një nga administratorët e Agjencisë së Pasurive të Sekuestruara dhe Konfiskuara pranë Ministrisë së Brendshme. Hetuesit po verifikojnë edhe angazhimin profesional të saj si një pistë tjetër e mundshme hetimi.
Sipas policisë, autorët dyshohet se kanë qenë dy persona që lëviznin me dy automjete të ndryshme. Njëri prej tyre i është afruar banesës, ka hedhur lëndën plasëse në oborr dhe më pas të dy janë larguar me shpejtësi nëpër rrugicat e zonës.
Ndërkohë, 39-vjeçari ka deklaruar se nuk ka konflikte me persona të tjerë, megjithëse ka pasur disa problematika të vogla që lidhen me aktivitetin e tij profesional.
