Një qytetar që banon në rrugën “Jordan Misja” në Tiranë ka ngritur një shqetësim serioz, i cili prek jo vetëm familjen e tij, por të gjithë banorët e zonës përreth. Sipas tij, gjendja e rrugës është përkeqësuar ndjeshëm, duke u shndërruar në një rrezik të përditshëm.
Rruga është ngushtuar në mënyrë alarmante, duke arritur gati vetëm një metër gjerësi. Për më tepër, ajo është e mbushur me gropa dhe pengesa të shumta, të cilat e zënë thuajse të gjithë hapësirën e kalimit dhe e bëjnë atë praktikisht të pakalueshme.
Banori thekson se situata bëhet edhe më shqetësuese në rast emergjencash. Nëse në këtë perimetër do të ndodhte një fatkeqësi, si për shembull një zjarr, ndërhyrja e shërbimeve të emergjencës do të ishte pothuajse e pamundur. Sipas tij, as zjarrfikëset dhe as ambulancat nuk mund të kalojnë në këtë rrugë, çka mund të çojë në pasoja tragjike.
Madje, sipas banorëve, rruga nuk është e aksesueshme as për persona me aftësi të kufizuara, pasi aty nuk mund të kalojë as një karrocë invalidi. Ata kërkojnë ndërhyrje të menjëhershme nga institucionet përgjegjëse për të rikthyer sigurinë dhe normalitetin në zonë, duke shmangur kështu rrezikun për jetën e qytetarëve.
