Oficerët e Byrosë Kombëtare të Hetimit, me urdhër të SPAK, kanë sekuestruar telefonin celular të Drejtorit të Përgjithshëm të Policisë së Shtetit, Ilir Proda. Veprimi procedural mësohet se është kryer në kuadër të një hetimi penal në zhvillim, pa dhënë ende detaje zyrtare mbi akuzat konkrete apo statusin e tij në këtë çështje.
Zhvillimi vjen vetëm pak ditë pas pezullimit nga detyra të nën/drejtorit të Policisë së Tiranës, Erion Ismailaj, i cili dyshohet se ka qenë i përfshirë në veprime të paligjshme, përfshirë ndihmën ndaj personave të tjerë në një rast pengmarrjeje. Hetimet kanë ngritur dyshime për lidhje mes zyrtarëve të policisë dhe individëve të përfshirë në aktivitete kriminale dhe korrupsion.
Burime pranë hetimit bëjnë me dije se SPAK po heton një skemë më të gjerë, ku struktura të caktuara të Policisë së Shtetit dyshohet se janë implikuar në bashkëpunim me grupe kriminale, përfshirë ryshfete, aktivitete të paligjshme dhe abuzime me pushtetin. Sekuestrimi i telefonit të kreut të Policisë shihet si një hap i rëndësishëm në thellimin e hetimeve që, sipas burimeve, mund të prekin nivele të larta drejtuese.
