Presidenti rus Vladimir Putin ka sulmuar ashpër liderët europianë, duke i quajtur “derrkucë të vegjël”, të cilët sipas tij kanë mbështetur luftën në Ukrainë me shpresën për të përfituar nga një dobësim apo rrëzim i Rusisë.
Deklaratat u bënë në prag të një takimi të rëndësishëm të liderëve të Bashkimit Europian, ku pritet të diskutohet për sigurimin e fondeve të reja për Ukrainën. Gjatë një mbledhjeje vjetore të Ministrisë ruse të Mbrojtjes, Putin tha se Europa kërkon “të rikuperojë diçka që ka humbur në periudha të mëparshme historike dhe të marrë hak ndaj Rusisë”.
Putin fajësoi ish-presidentin amerikan Joe Biden, duke e akuzuar se “me vetëdije” ka nxitur luftën në Ukrainë, ndërsa shtoi se liderët europianë “u rreshtuan menjëherë pas amerikanëve”. Rusia nisi pushtimin e plotë të Ukrainës në shkurt të vitit 2022, një veprim që solli sanksione të gjera perëndimore dhe izolim diplomatik për Moskën.
Presidenti rus pretendoi se pavarësisht presionit ndërkombëtar, Rusia ka treguar qëndrueshmëri ekonomike, financiare dhe politike, si edhe forcim të kapaciteteve mbrojtëse. Ai shtoi se Moska është e hapur për dialog me Europën, por jo me “politikanët aktualë europianë”, të cilët sipas tij e bëjnë dialogun të pamundur.
Edhe pse Kremlini herë pas here shprehet i hapur për negociata, Rusia ka vijuar operacionet ushtarake dhe ka refuzuar propozimet për paqe që parashikojnë tërheqjen nga territoret e pushtuara në Ukrainë. Kievi dhe aleatët e tij e akuzojnë Moskën se i përdor bisedimet vetëm si mjet presioni, jo si përpjekje reale për paqe.
Ndërkohë, zyrtarë amerikanë dhe rusë pritet të takohen këtë fundjavë në Miami, në kuadër të përpjekjeve të administratës Trump për t’i dhënë fund luftës që prej gati katër vitesh ka përfshirë Ukrainën dhe Rusinë.
Nga ana tjetër, sekretari i përgjithshëm i NATO-s, Mark Rutte, paralajmëroi javën e kaluar se vendet anëtare duhet të përgatiten më seriozisht për rrezikun e një lufte të shkallës së gjerë, duke shtuar se Rusia mund të jetë gati për të sulmuar brenda pesë viteve të ardhshme.
