SPAK i është drejtuar sot, më 16 dhjetor, Kuvendit të Shqipërisë me një kërkesë për autorizim, në kuadër të një hetimi ndaj Belinda Ballukut, në cilësinë e deputetes, ministres dhe zëvendëskryeministres. Kërkesa lidhet me vijimin e procedurave ligjore ndaj saj, sipas rregullave kushtetuese që parashikojnë miratimin parlamentar për masa ndaj zyrtarëve me imunitet.
Sipas Prokurorisë së Posaçme, Balluku është marrë e pandehur për akuzën e “shkeljes së barazisë së pjesëmarrësve në tendera apo ankande publike”, e kryer në bashkëpunim. Akuza lidhet konkretisht me procedurën e prokurimit për ndërtimin e tunelit të Llogarasë, për të cilën SPAK dyshon se janë shkelur rregullat ligjore të konkurrencës.
Ndërkohë kryeministri Edi Rama ka reaguar pasi Prokuroria e Posaçme i është drejtuar Kuvendit të Shqipërisë me një kërkesë për heqjen e imunitetit të deputetit të Belinda Ballukut dhe autorizimin për arrestimin e saj. Kreu i qeverisë kritikon arrestet në burg ose në shtëpi, pa gjyq, duke e cilësuar të turpshëm "faktin që Shqipëria është bërë një vend me më shumë të paraburgosur se sa të burgosur".
Në fund të reagimit të tij, numri një i qeverisë thotë se sa i përket grupit parlamentar të Partisë Socialiste në Kuvendin e Shqipëisë, kjo forcë qeverisë do të shqyrtojë kërkesën e SPAK dhe do të mbajë një qëndrim të drejtë.
