Pas gati gjashtë muajsh hetimesh, autoritetet italiane kanë zbardhur vrasjen e 58-vjeçarit shqiptar Fatos Cenaj, i cili u ekzekutua me një plumb në kokë më 8 qershor në Fontanaviva të Padovës. Trupi i tij u gjet në një rrugë rurale pranë banesës ku jetonte me familjen, ndërsa viktima ishte ish-roje burgu me një të kaluar të pastër.
Të shtunën, më 13 dhjetor, karabinierët arrestuan fqinjin e tij, Moreno Violetto, 45 vjeç, i dyshuar si autor i krimit. Hetimet zbuluan se ai kishte tentuar të maskohej duke përdorur helmetë, maskë respiratore dhe tatuazhe të rreme, të blera online, si dhe kishte ndryshuar pamjen e biçikletës për të shmangur identifikimin.
Provat shkencore të RIS konfirmuan përputhjen mes mbetjeve të armës së zjarrit dhe gjurmëve të gjetura në biçikletën e të dyshuarit. Në një magazinë pranë banesës së tij u sekuestruan edhe municione artizanale, ndërsa 45-vjeçari ndodhet tashmë në burgun “Due Palazzi”, ku përballet me akuzën e vrasjes së rëndë.
