Një video që po qarkullon gjerësisht në rrjetet sociale tregon momentin kur një kopje e Statujës së Lirisë rrëzohet nga erërat e forta në Brazil.
Ngjarja ka ndodhur në qytetin Guaíba, në një zonë ku autoritetet kishin shpallur alarm të kuq për shkak të stuhive dhe erërave të forta. Në pamje shihet se si struktura humbet ekuilibrin dhe shembet përtokë, duke u dëmtuar plotësisht.
Sipas raportimeve lokale, replika shërbente si element dekorativ jashtë një objekti tregtar. Fatmirësisht, nga incidenti nuk raportohet për persona të lënduar, ndërsa dëmet duket se janë vetëm materiale.
Brazili ka disa modele të Statujës së Lirisë, të vendosura kryesisht nga biznese apo qendra tregtare për qëllime promovuese. Rasti ka nxitur reagime dhe diskutime online lidhur me standardet e sigurisë dhe mënyrën se si struktura të tilla të mëdha sigurohen gjatë motit ekstrem.
