Dy shtetas të Kosovës u plagosën sot pasi një avion i vogël sportiv, me të cilin po udhëtonin, u rrëzua në Liqenin e Mavrovës. Sektori për Punë të Brendshme në Tetovë bëri të ditur se të lënduarit, të moshës 41 dhe 64 vjeç, u transportuan menjëherë në Spitalin e Gostivarit për trajtim mjekësor.
Sipas njoftimit, avioni i vogël u rrëzua rreth orës 12:35 në afërsi të digës së Kanalit të Beliçit. Dy personat në bord, XH.P. dhe D.M, ky i fundit piloti i mjetit fluturues, arritën të dilnin vetë nga avioni në tokë. Ata pësuan lëndime, por u nxorën në gjendje të vetëdijshme dhe u dërguan për ndihmë mjekësore në Qendrën Mjekësore të Gostivarit.
Piloti 64-vjeçar deklaroi para policisë se gjatë fluturimit motori i avionit pësoi një defekt, gjë që e detyroi të ndërmerrte ulje emergjente në liqen.
Qendra për Menaxhimin e Krizave në Maqedoninë e Veriut njoftoi se menjëherë pas marrjes së informacionit për incidentin, në vendngjarje u angazhuan ekipet e ndihmës së shpejtë, njësitë rajonale të menaxhimit të krizave për ndërhyrje të shpejtë dhe përfaqësues nga Sektori për Punë të Brendshme në Tetovë.
Mediat në Maqedoninë e Veriut raportuan se avioni i rrëzuar, i markës Piper, ka kapacitet për deri në katër persona. Mjeti fluturues, i prodhuar në vitin 1961, është i regjistruar në Shtetet e Bashkuara në emër të 64-vjeçarit.
