Një qytetar ka raportuar një episod shqetësues në bregdetin e Golemit, ku një kamion është filmuar duke hedhur inerte direkt në vijën ujore. Në pamje duket qartë mjeti i rëndë i futur deri në det, me koshin e ngritur, teksa shkarkon materialet ndërtimore në ujë.
Sipas denoncimit, ngjarja ka ndodhur në mes të ditës, në një zonë të frekuentuar, duke treguar mungesë të plotë kontrolli nga autoritetet përgjegjëse. Veprimet e tilla dëmtojnë ekosistemin detar, ndikojnë në erozionin e vijës bregdetare dhe ulin cilësinë e territorit që përdoret çdo verë nga mijëra pushues.
Banorët kërkojnë identifikimin e firmës që kryen këtë aktivitet dhe masa të menjëhershme për ta ndaluar. Ata theksojnë se nuk është rasti i parë që vërehen hedhje inertesh në zonë, ndërsa situata po përsëritet prej kohësh pa ndonjë ndëshkim të dukshëm.
Institucionet përkatëse nuk kanë dhënë ende një reagim zyrtar.
