Të mërkurën në orën 15:00, në Kishën e Shën Paraskevit në Agios Leontas, do të zhvillohet ceremonia mortore për vogëlushin dyvjeçar që humbi jetën pas një sulmi tragjik nga qeni i familjes në Zakynthos. Ngjarja ndodhi pasi fëmija, sapo ishte kthyer nga pazari me prindërit, iu afrua kafshës në oborr, moment në të cilin qeni e sulmoi duke i shkaktuar plagë të rënda.
Pavarësisht ndërhyrjes së menjëhershme dhe transportimit urgjent në spital, mjekët nuk arritën ta mbanin në jetë të miturin. Prindërit e tij, babai shqiptar dhe nëna britanike, u arrestuan fillimisht nën akuzën e vrasjes nga pakujdesia, por pas paraqitjes para gjykatës u lanë të lirë me urdhër të prokurorit. Ndërkohë, qeni i racës pitbull u transferua në një strehë për kafshë endacake në Pyrgos.
Sipas raportimeve lokale, familja shpesh postonte foto të fëmijës me kafshët që kishte strehuar, duke treguar një lidhje të ngushtë me to. Tragjikisht, vetëm dhjetë ditë para ngjarjes, vogëlushi Leo kishte festuar ditëlindjen e tij të dytë.
