Në Durrës u zhvillua sot një protestë në kujtim të 15-vjeçarit Erjon Boba, i cili humbi jetën pas plagëve të marra me thikë në një konflikt mesnxënësish. Mes pjesëmarrësve ishte edhe halla e tij, Bahrie Çupi, e cila u shfaq e tronditur dhe e zhgënjyer nga pjesëmarrja më e ulët se sa ishte pritur.
Ajo bëri një apel të fortë ndaj shoqërisë, duke thënë: “Kjo neglizhencë e një populli para një tragjedie tregon rënie të ndërgjegjes shoqërore… ne djali na iku e s’na kthehet më, por nesër mund të ketë një Erion tjetër. Thikat e Erionit mund të jenë thikat e një fëmije tjetër nesër. Ngushëllimi më i thellë do të ishte që njerëzit të ishin sot këtu në protestë”, ndërsa falënderoi shqiptarët për mbështetjen dhe mesazhet e shumta të ngushëllimit.
Ngjarja e rëndë nisi pas një konflikti të vazhdueshëm mes Erjonit dhe një 14-vjeçari, që sipas hetimeve kishte fillesat në rrjetet sociale dhe ofendime në shkollë. Çështja degradoi kur të dy të miturit u takuan për “sqarime”, moment gjatë të cilit 14-vjeçari e goditi Erjonin me thikë disa herë. Pavarësisht ndërhyrjes së mjekëve, 15-vjeçari nuk mundi t’u mbijetojë plagëve, duke ndërruar jetë pas nëntë ditësh luftë me jetën.
