Emigrantët shqiptarë në Gjermani vijojnë të përqendrohen kryesisht në punë me aftësi të ulëta dhe të mesme, sipas të dhënave të publikuara nga Bruegel. Gati gjysma e tyre punojnë në profesione fizike apo gjysmë-të kualifikuara, ndërsa një pjesë tjetër e madhe angazhohen në role teknike dhe zanatçinjsh. Ky pozicionim tregon kërkesën e lartë të tregut gjerman për punëtorë bazikë, por njëkohësisht pasqyron mungesën e një mase të gjerë profesionistësh të kualifikuar nga Shqipëria.
Në nivel të profesioneve të specializuara, përqindjet mbeten të ulëta. Vetëm një numër i vogël shqiptarësh punojnë si specialistë në shëndetësi, teknologji apo profesione që kërkojnë arsim të avancuar, shumë më pak krahasuar me vendet e tjera të Ballkanit, ku pjesëmarrja në rolet e larta profesionale është dukshëm më e madhe. Ndërkohë, vendet e Europës Perëndimore paraqesin një strukturë krejt tjetër të fuqisë punëtore, me thuajse një të tretën e punonjësve të përfshirë në kategori eksperte.
Ky profil i emigracionit shqiptar nënvizon një sfidë të dyfishtë: Gjermania vazhdon të mbështetet te punëtorët nga Ballkani për sektorët bazë, ndërsa Shqipëria rrezikon boshatisjen e profesioneve të kërkuara për shkak të mungesës së investimit afatgjatë në arsimin profesional dhe tërheqjes së ulët për karrierat e specializuara brenda vendit.
