Ndërkohë që SPAK po intensifikon hetimet për korrupsionin për AKSHI-n, institucioni kyç i teknologjisë në vend, Komisioni i Prokurimit Publik (KPP) ka marrë vendimin për të zhbllokuar një nga tenderët më të rëndësishëm dhe të diskutueshëm: atë me vlerë 7.7 milionë euro për mirëmbajtjen e sistemit thelbësor të fiskalizimit.
Ky zhbllokim vjen pas një periudhe të gjatë dhe të dyshimtë, duke lënë sistemin e faturimit elektronik (i cili përdoret nga 125 mijë tatimpagues) në paqartësi për gati gjashtë muaj. KPP e kishte pezulluar këtë procedurë (që ka në objekt “Mirëmbajtjen e Modulit të Menaxhimit të Kontrollit të Faturimit” 24/7) për shkak të parregullsive dhe shkeljeve procedurale, të cilat institucionet, AKSHI dhe Drejtoria e Përgjithshme e Tatimeve, u detyruan të rregullonin dhe konfirmonin zyrtarisht më 20 nëntor.
Vendimi për këtë tender gjigant nuk është një rast i izoluar, por pason një tjetër vendim të debatueshëm të KPP-së. Vetëm pak ditë më parë, KPP zhbllokoi një tjetër tender problematik të AKSHI-t, me vlerë rreth 2.4 milionë euro, për integrimin e sistemeve të ndihmës ekonomike. Ky i fundit kishte qëndruar i bllokuar për gati një vit, i rrethuar nga ankesa dhe dyshime për anulim pas shpalljes së fituesit.
Më shqetësuese mbetet kronologjia. Zhbllokimi i tenderit të dytë (2.4 milionë euro) ndodhi pikërisht në të njëjtën ditë kur ish-drejtoresha e AKSHI-t, Mirlinda Karçanaj, iu nënshtrua një marrjeje në pyetje rreth tre orësh në Prokurorinë e Posaçme. Ajo po hetohet në lidhje me të paktën 12 tenderë të dyshuar si problematikë.
Marrja në pyetje dhe hetimet e SPAK pritet të zgjerohen te emra të tjerë kyç në prokurimet e teknologjisë, përfshirë Ermal Beqirin dhe Gerond Meçen, duke thelluar dyshimet se zhbllokimet e shpejta të këtyre procedurave të shtrenjta po kryhen nën një presion të fortë politik dhe institucional, ndërkohë që sistemi i AKSHI-t ndodhet praktikisht në bankën e të akuzuarve.
