Një tjetër rast i pakënaqësisë qytetare vjen në adresë të redaksisë sonë, duke rikthyer në qendër të debatit mënyrën e vendosjes së gjobave nga Policia e Shtetit dhe standardet e dyfishta që, sipas qytetarëve, po bëhen gjithnjë e më të dukshme.
Qytetari po furnizonte një market në zonën ku ishte vendosur tabelë e qartë: parkimi i lejuar nga ora 07:00 deri në 09:00. Megjithatë, pavarësisht respektimit të rregullit, ai është ndëshkuar me gjobë. Ky veprim ka ngritur dyshime të forta mbi mënyrën e ushtrimit të kontrollit dhe interpretimit të rregullave nga ana e policisë.
Sipas qytetarit, kjo nuk është një situatë e izoluar. Ai thekson se shpesh herë automjete të caktuara, të “njohura” për efektivët, lejohen të qëndrojnë edhe në mes të rrugës, pa u gjobitur apo qortuar. Ndërsa qytetarë të zakonshëm penalizohen edhe kur respektojnë sinjalistikën.
Këto raste ushqejnë perceptimin se pabarazia në vendosjen e gjobave është kthyer në një ndër shqetësimet më të mëdha të qytetarëve. Kur ligji nuk zbatohet njësoj për të gjithë, krijohet një kulturë mosbesimi dhe pakënaqësie, duke cenuar autoritetin e institucioneve që duhet të garantojnë rendin dhe barazinë përballë ligjit.
