Një oficer rezervist i ushtrisë izraelite ka humbur jetën duke kryer vetëvrasje, pasi vuante nga trauma të rënda psikologjike të lidhura me pjesëmarrjen e tij në ofensivën tokësore në Gaza. Rasti është bërë publik nga Israel Hayom, që raporton se 28-vjeçari nga brigada Givati u përball me një gjendje të rëndë të stresit post-traumatik (PTSD), e cila e kishte shoqëruar që prej ditëve të para të luftës.
Oficeri, i identifikuar si Thomas Edzgoscus, kishte shprehur vazhdimisht në rrjetet sociale se ndiente veten “të shkatërruar dhe të humbur”, duke e cilësuar gjendjen e tij si një “betejë mendore” të nisur pas 7 tetorit. Në një nga mesazhet e tij të fundit, ai shkruante:
“Nuk mundem më. Jam i shkatërruar dhe i rrënuar… Kam bërë gjëra që nuk mund të falen dhe s’mund të jetoj më me to. Ka dy vjet që nuk po arrij të jetoj me veten time.”
Ai shtonte se brenda vetes “kishte një demon që e përndiqte që prej 7 tetorit”, ndërsa u kërkonte të tjerëve të kujtonin “Thomasin që ishte oficer dhe komandant i snajperëve”, duke theksuar se “ai Thomas kishte vdekur më 7 tetor”.
Sipas të dhënave zyrtare izraelite të publikuara në fund të tetorit, gjatë 18 muajve të fundit janë regjistruar 279 tentativa vetëvrasjeje mes personelit ushtarak, shifra që lidhen kryesisht me traumën e luftës. Raportime të ndryshme tregojnë se mijëra ushtarë janë diagnostikuar me PTSD që prej nisjes së ofensivës në Gaza.
Media izraelite dhe burime të pavarura theksojnë se shumë prej këtyre rasteve lidhen me përballjen e drejtpërdrejtë me skenat e luftimeve, humbjen e shokëve të ushtrisë dhe barrën e ngjarjeve që kanë lënë pasoja të thella psikologjike. Disa raporte sugjerojnë se ushtria ka tentuar të fshehë një pjesë të rasteve dhe madje të varrosë ushtarë pa ceremoni ushtarake, për të shmangur ekspozimin e krizës në rritje.
Situata është rënduar edhe më tej nga mungesa e forcave aktive, duke bërë që ushtria të rikthejë në front madje edhe ushtarë tashmë të diagnostikuar me PTSD, një praktikë që ka ngritur shqetësime serioze brenda dhe jashtë Izraelit.
