Takimi i paralajmëruar i Ervin Salianjit dhe Ilir Alimehmetit në Durrës duket se ka alarmuar krerët e Partisë Demokratike lokale.
Pas deklaratës së Sali Berishës, i cili e përmendi takimin si një ngjarje për interesa personale, dy kryetarët e degëve në Durrës, Ard Muka dhe Osman Stafa, kanë dërguar një SMS automatike për rreth 5 mijë anëtarë të kësaj partie.
Në mesazhin e tyre, ata theksojnë se Salianji dhe Alimehmeti janë “persona të paautorizuar” dhe se çdo analizë do të bëhet brenda forumeve të partisë. Një reagim i menjëhershëm ka ardhur nga një prej anëtarëve, i cili u kërkon krerëve lokalë të mos e kontaktojnë më me numrin e tij.
SMS Automatik nga Kryetarët e PD:
"I nderuar anëtar i PD, dega Durrës!
Persona të paautorizuar kanë shpërndarë një njoftim për takim me strukturat tona. Ky njoftim nuk ka të bëjë as me Partinë Demokratike dhe as me agjendën e saj. Ai njoftim është fund e krye dezinformim.
Partia Demokratike sot ka në fokus betejën kundër korrupsionit Rama–Balluku në Tunelin e Llogarasë dhe aferave të tjera korruptive të tyre. Ndërkohë, po hyjmë në procesin e brendshëm të analizës, gjithnjë vetëm brenda forumeve të Partisë.
Prandaj, ne, si anëtarë të PD-së, distancohemi nga këto të ashtuquajtura takime të njoftuara për nesër, datë 3 Dhjetor.
Me respekt, Kryetarët e degëve Durrës 1 dhe 2, Ard Muka dhe Osman Stafa"
Përgjigjja e Anëtarit:
"Zotëri, mos më kontaktoni më me këtë numër. Kam përfunduar prej kohësh me këtë parti që e quajnë Berishizëm."
