Vetëm pak ditë pasi ka marrë detyrën si kryetare e Bashkisë së Vlorës, Brunilda Mersini ka kryer një nga lëvizjet e para në pozicionet kyçe të administratës lokale. Sot është zyrtarizuar emërimi i drejtorit të ri të Ndërmarrjes së Shërbimeve Publike, një vendim që ka ngjallur menjëherë reagime për shkak të marrëdhënies së ngushtë mes të emëruarit dhe kryetares së bashkisë.
Sipas fotove të publikuara gjatë fushatës së Partisë Socialiste, Mersini dhe Ilir Aliaj shfaqen së bashku në disa aktivitete, duke lënë të kuptohet se midis tyre ekziston një miqësi e vjetër shumëvjeçare. Ky fakt ka ngritur pikëpyetje mbi mënyrën e përzgjedhjes së personave që marrin drejtimin e institucioneve të rëndësishme në bashki.
Në një qytet ku qytetarët presin transparencë, meritokraci dhe një qasje profesionale në administrimin e shërbimeve publike, ky vendim është parë nga disa si një tjetër shembull i praktikës së vjetër të shpërblimit të njerëzve të afërt, në vend të vlerësimit të aftësive dhe eksperiencës profesionale.
Ndërsa Vlora ka nevojë për përmirësime të dukshme në menaxhimin e hapësirave publike, pastërtinë dhe infrastrukturën, emërimi i miqve të ngushtë në krye të institucioneve shton dilemat mbi prioritetet dhe drejtimin që po merr administrata e re.
Nëse ky emërim do të sjellë ndryshime pozitive për qytetin apo thjesht do të shtojë pakënaqësitë, mbetet për t’u parë në vazhdim.
