Një ish-futbollist i kombëtares së Anglisë dhe Premier League është arrestuar në Aeroportin e Stansted, i dyshuar për tentativë përdhunimi ndaj ish-partneres së tij. Lojtari, i cili ka veshur fanellën e “Tre Luanëve” gjatë viteve 2010, u ndalua nga autoritetet kufitare në zonën e kontrollit të pasaportave, pasi sistemi tregoi se ai ishte në kërkim nga policia lidhur me një denoncim të bërë disa javë më parë.
Sipas burimeve, agjentët e Border Force e larguan në mënyrë diskrete futbollistin pak para se të hipte në një fluturim me kosto të ulët të dielën në mbrëmje. Menjëherë pas kësaj, oficerë të Policisë së Essex-it mbërritën në aeroport dhe proceduan me arrestimin. Akuzat lidhen me deklarimet e ish-partneres, e cila pretendon se ai ka tentuar ta përdhunojë gjatë kohës së marrëdhënies së tyre. Ajo është marrë në pyetje nga specialistë të krimeve seksuale dhe ka marrë mbështetjen e nevojshme psikologjike.
I dyshuari, i cili për arsye ligjore nuk mund të identifikohet, u shoqërua në një komisariat lokal, ku iu morën shenjat e gishtave, mostër ADN-je dhe foto zyrtare. Pas disa orësh në mbajtje, ai u lirua me kusht, ndërsa hetimet po vijojnë.
Arrestimi ka shkaktuar reagime, pasi lojtari kishte marrë pjesë së fundmi në disa evente publike, pavarësisht se ishte zyrtarisht në kërkim nga autoritetet.
