Më 28 Nëntor, në Ditën e Flamurit, fshati Garanë i Kërçovës u mbush me krenari shqiptare teksa u përurua busti i Gjergj Kastriotit Skënderbeut, vepër e mjeshtrit Fiqiri Kasa. Qindra banorë u mblodhën në qendër të fshatit për të nderuar figurën që simbolizon lirinë, qëndresën dhe unitetin e shqiptarëve kudo. Vendosja e monumentit në këtë trevë shqiptare përbën një moment historik dhe një mesazh të fuqishëm për ruajtjen e identitetit tonë kombëtar.
Ceremonia ishte e mbushur me emocione të thella patriotike, ku flamujt kuqezi valëviteshin në duart e fëmijëve dhe të të moshuarve, ndërsa këngët patriotike kumbonin mes shtëpive të Garanës. Banorët vendosën kurora dhe nderuan Skënderbeun si simbol të krenarisë dhe të qëndresës shqiptare, duke treguar edhe një herë se tradita dhe historia jonë mbeten shtylla të komuniteteve shqiptare në Maqedoninë e Veriut.
Vendosja e bustit të Skënderbeut është një fitore e shpirtit shqiptar, një dëshmi se, pavarësisht pengesave dhe vështirësive, komuniteti vazhdon të mbrojë e të çojë përpara kulturën dhe identitetin e vet. Pamjet e dërguara nga dita e përurimit pasqyrojnë momente të paharrueshme krenarie kombëtare, duke e shndërruar këtë ngjarje në një festë të vërtetë shqiptarie në zemër të Kërçovës.
