Sot shënohen dy vite nga vrasja e Liridona Ademajt, ngjarje që tronditi opinionin publik. Familja e të ndjerës ka kërkuar burgim të përjetshëm për Naim Murselin, Granit Plavën dhe Kushtrim Kokallën, ndërsa dokumentet e Forenzikës Psikiatrike, të siguruara nga mediat në Kosovë tregojnë se krimi ishte i planifikuar në detaje.
Granit Plava, një nga autorët e krimit, ka dhënë dëshmi të detajuara për momentin e vrasjes, duke pohuar se Murseli i kishte thënë të qëllonte. Ai deklaroi:
“Ata e hapën pak xhamin dhe unë qëllova në drejtim të saj. Naimi më thoshte ‘gjuaj, gjuaj,’ po unë u nisa drejtë e poshtë dhe arrita te shtëpia me makinë.”
Plava tregoi gjithashtu se kishte takuar Naimin dy ditë para ngjarjes, ku kishin dalë natën dhe kishin pirë. Në ditën e krimit, ai u zgjuar herët dhe rreth orës 09:30-10:00, Naimi kishte shkuar ta marrë për të udhëtuar drejt Prishtinës.
Ai përshkroi më tej momentet para krimit:
“Naimi shkoi përpara me makinë, unë pas tij. Ndaluam tek një pompë dhe ai më dha një armë me 5 fishekë në magazinë, plus 15 të tjerë. Kur arritëm në Prishtinë, e ndjeva një ndjesi të fortë ankthi. E përcolla deri te shtëpia e saj. Kur dola në rrugë, shikoja nga Naimi, por nuk u takuam. Ai hyri te familja e vet, unë vazhdova drejt Prishtinës.”
Plava tha se kishte ndjekur ngjarjen hap pas hapi “Pasi arrita në shtëpi, pyeta çfarë kishte ndodhur dhe më thanë se e kishte gjetur të vdekur. Dy ditë më pas, policia erdhi dhe më arrestoi.”
Dëshmia e Plavës, e cila përshkruan detaje të ngjarjes dhe urdhërat e dhëna nga Naim Murseli, ofron një pasqyrë të qartë të mënyrës se si u planifikua dhe u ekzekutua krimi. Familja e Liridonës kërkon drejtësi, ndërsa rasti vazhdon të ndjekë rrugën e tij ligjore.
