Në aksin Librazhd-Prrenjas janë të shumta rastet kur drejtuesit e mjeteve ndëshkohen për manovra të rrezikshme, si parakalime të gabuara apo shpejtësi tej normave.
Por së fundmi, qytetarët kanë vënë re se të njëjtat manovra kryhen edhe nga efektivët e policisë, të cilët parakalojnë pa ndezur sirenat dhe dalin papritmas përpara kamionëve dhe automjeteve të tjera duke u bërë shkak për ndonjë aksident të mundshëm.
Dëshmitarët tregojnë se këto veprime rrezikojnë seriozisht sigurinë e drejtuesve të tjerë të mjeteve.
Qytetarët shprehen se shkeljet e vogla, si tejkalimi i shpejtësisë apo parakalimet e gabueshme, sjellin gjoba dhe masa të rrepta ndaj tyre, ndërsa automjetet zyrtare kryejnë manovra të rrezikshme pa pasur pasoja ligjore.
Banorët kërkojnë transparencë dhe përgjegjësi nga autoritetet e rendit, duke theksuar se ligji duhet të zbatohet njësoj për të gjithë dhe siguria në rrugë nuk duhet të favorizojë askënd.
