Mediat italiane kanë publikuar identitetet e 24 personave të dyshuar, ndaj të cilëve Gjykata e Breshias ka lëshuar urdhër-arresti, si pjesëtarë të një klani shqiptar që dyshohet se ka trafikuar drejt Italisë rreth 1.3 tonë kokainë përgjatë një periudhe pesëvjeçare. Sipas hetimeve, grupi ka vepruar përmes një rrjeti të mirëstrukturuar, duke siguruar furnizim të vazhdueshëm me kokainë dhe heroinë dhe duke e shpërndarë atë në disa provinca italiane.
Autoritetet italiane kanë ekzekutuar masa paraprake ndaj 24 të dyshuarve, nga të cilët 21 janë vendosur në arrest me burg dhe 3 në arrest shtëpie. Paralelisht, janë sekuestruar asete me vlerë rreth 3 milionë euro, të dyshuara të përfituara nëpërmjet aktivitetit kriminal. Hetimi i prokurorisë ka mundësuar rindërtimin e të gjithë rrjetit të transportit të drogës, duke dokumentuar lëvizjen e sasisë së konsiderueshme prej më shumë se 1.3 tonësh lëndë narkotike.
Policia shqiptare ka vënë në pranga Asti Llupin, Erald Sallën dhe Altin Shehajn, të arrestuar në zbatim të urdhrit të Gjykatës së Breshias. Të tre dyshohen se kanë qenë pjesë e logjistikës së trafikut, duke bashkëpunuar me strukturën kriminale që vepronte midis Shqipërisë dhe Italisë.
Hetimet vijojnë me qëllim zbardhjen e rolit të secilit prej të dyshuarve dhe identifikimin e çdo pasurie të përfituar përmes aktivitetit të paligjshëm.
