Një ngjarje tragjike ka tronditur sot fshatin Mlizë në Bashkinë Elbasan, ku 39-vjeçari Ilia Tahiri u gjet i mbytur në përroin pranë banesës së tij. Momente nga incidenti janë fiksuar nga kamerat e sigurisë, dhe sipas të afërmve, duket se viktima ka tentuar të kalojë urën në momentin kur përroi kishte prurje të mëdha.
Banorët e zonës shprehen të tronditur, duke theksuar se një ngjarje e tillë nuk është regjistruar më parë në fshat. Sipas tyre, prurjet e fuqishme të përroit, që tejkalonin nivelin e urës, kanë qenë shkaku kryesor i tragjedisë. Ata e përshkruajnë Tahirin si një person të qetë dhe shumë miqësor.
Hetimet paraprake dyshojnë se 39-vjeçari ka rrëshqitur aksidentalisht dhe është marrë nga rrjedha e përroit. Kërkimet vijuan gjatë gjithë natës, ndërsa trupi i tij u gjet në orët e para të mëngjesit nga ekipet e zjarrfikësve dhe emergjencave të Elbasanit.
