Një banesë njëkatëshe në lagjen “Skënderbeg” të Lezhës u përfshi nga flakët mëngjesin e së enjtes, rreth orës 08:00. Zjarri shkrumboi plotësisht njërën prej dhomave të shtëpisë, ndërsa tymi u përhap me shpejtësi në gjithë ambientin.
Në momentin e ngjarjes, në banesë nuk ndodhej asnjë anëtar i familjes. Fqinjët ishin të parët që vunë re flakët dhe njoftuan menjëherë zjarrfikësit dhe policinë, të cilët mbërritën në vendngjarje dhe izoluan zjarrin.
Sipas të dhënave paraprake, dyshohet se zjarri ka nisur nga një rezistencë elektrike e lënë e ndezur. Autoritetet po vijojnë hetimet për të përcaktuar shkaqet e plota të ngjarjes
