Një ngjarje tragjike ka tronditur fshatin Mlizë të Elbasanit, ku 35-vjeçari Florian Tahiri ka humbur jetën pasi u rrëmbye nga përroi që kalon pranë zonës. Sipas informacioneve paraprake, dyshohet se i riu ka rënë në ujë në një moment pakujdesie, ndërsa mendohet se ka qenë nën efektin e alkoolit.
Familjarët dhe banorët e zonës njoftuan menjëherë autoritetet, duke nisur kërkimet që mbrëmjen e djeshme. Pavarësisht terrenit të vështirë dhe rrjedhës së fuqishme të përroit, ekipet e kërkim-shpëtimit vijuan operacionin gjatë gjithë natës.
Në orët e para të mëngjesit, forcat zjarrfikëse dhe ato të emergjencave civile të Elbasanit arritën të gjenin trupin e pajetë të 35-vjeçarit. Autoritetet kanë nisur hetimet për të zbardhur plotësisht rrethanat e ngjarjes së rëndë.
